Hversu Noregr byggðist (Flateyjarbók)

Velg språk	Norrønt	Islandsk	Norsk	Dansk	Svensk	Færøysk
Denne teksten finnes i flere utgaver på følgende språk ►

Flateyjarbók

| Huersu Noregr bygdiz

Nv skal segia dęmi til huersu Noregr bygdiz i fystu edr huersu konunga ættir hofuz þar edr i odrum londum. edr hui þeir heita Skiolldungar Budlungar Bragningar Odlingar Vaulsungar edr Niflungar sem konunga ættirnar eru af komnar. Forniotr het madr hann aatti .iij. sonu. var einn Hler. annar Logi. þridi Kari. hann reed fyrir vindum enn Logi fyrir elldi. Hlier fyrir sio. Kaari var fadir Jokuls faudur Snærs konungs. enn baurn Snærs konungs voru þau Þorri Faunn Drifa ok Mioll. Þorri var konungr agætr. hann reed fyrir Gottlandi Kỏnlandi ok Finnlandi. hann blotudu Kỏnir til þess at sniofa gerdi ok væri skidfæri gott. þat er aar þeirra. þat blot skylldi vera at midium vetri. ok var þadan af kalladr Þorra manadr. Þorri konungr aatti .iij. born. synir hans hetu Nỏrr ok Gorr enn Gỏi dottir. Goi huarf a brot ok gerdi Þorri blot maanadi sidarr enn hann var vanr at blota. ok kaulludu þeir sidan þann maanad er þa hofzst Gỏi. Þeir Norr ok Gorr leitudu systur sinnar. Norr atti bardaga stora fyrir vestan Kiolu ok fellu fyrir honum þeir konungar er sua heita. Vee ok Vei Hundingr ok Hemiagr. ok lagdi Norr þat land vndir sik allt til siofar. Þeir brædr funduz i þeim firdi er nu er kalladr Norafiordr. Norr for þadan vpp a Kiolu ok kom þar sem heita Vlfamoar. þadan for hann vm Eystridali ok siþan i Vermaland ok med vatni þui er Vænir heitir ok sua til siofar. þetta land allt lagdi Norr vndir sik allt fyrir vestan þessi takmork. þetta land er nu kalladr Noregr. At midium vetri komu þeir i Heidmork. þar var sa konungr fyrir er Rolfr i Bergi het. hann var sun Suada iotuns nordan af Dỏfrum ok Aashilldar dottur Eysteins konungs er leingi hafdi raadit fyrir He[idmork]. Rolfr i Bergi hafdi tekit Goi ok geingit at eiga hana. enn er hon spurdi til Nors brodur sins. þa for hon i mot honum ok þau Rolfr. ok gaf hann sik vpp i valld Nors ok gerdizst hans madr. eptir þat for Norr til veizslu til maags sins ok feck Norr Hoddu dottur Suada iotuns systur Rolfs. Eptir þat for Norr konungr vestr aftr til siofar ok þa hitti hann Gor brodur sinn. hann var þa kominn nordan or [Dumbs]hafi ok hafdi eignaz eyiar allar aa þeirri leid bædi bygdar ok vbygdar. þa skiptu þeir brædr rikinu med ser sua at Norr skylldi hafa meginland allt nordan fra Jotunheimum ok sudr til Aalfheima. þat heitir nu Noregr. enn Gorr skylldi hafa eyiar allar þær er laagu a bakborda ellida h[ans] er hann færdi nordan med landi. Þeir voru synir Gora sækonungs Beiti ok Heiti. Meitir ok Geitir. Beitir sækonungr for med ellida inn i Þrỏndheim ok inn i Beitsio. hann let gera skipsleda vndir ellidann. enn snior var mikill ok sledfæri gott. þa settiz Beitir i lypting ok lagdi styri i lag ok let draga vpp segl ok let menn sina draga ellidann nordr vm Ellidaeid til Naumudals ok eignadi ser land allt þat er laa a bakborda. Beiti sækonungr var fadir Heita sækonungs faudur Suada. enn Geitir var fadir Glamma ok Gylfa. Meiti sækonungr var fadir Męfils ok Myndils. Myndill var fadir Eckils ok Skeckils. Norr var fadir þessarra manna enn Hodd dottir Sauda modir Þraandar ok Gardz er kalladr var agde. enn er þeir skiptu arfi þa hlaut Þrandr Þrandheim ok heitir þui sua. Gardr agde var fadir þeirra er sua heita. Hordr Rugalfr Þrymr Vegardr Freygardr Þorgardr ok Griotgardr. Hỏrdr laut Hordaland or skipti. hans son var Jofurr edr Josurr fadir Hiors konungs fodur Hiorleifs hins kuensama. Rugalfr aatti Rogaland. hans son var Rỏgnualldr fadir Augualldz konungs. Þrymr aatti Agdir. hans son var Agdi ok Agnar fadir Ketils Þryms er bu aatti i Þrumu. Vegardr aatti Sygnafylki. hann var fadir Vedrorms faudur Vemundar hins gamla er Sygntrauste kalladiz. Freygardr aatte Fiordu ok Fialer. hans synir voru þeir Freysteinn gamli er bu aatti aa Gaulum ok Freybiorn fadir Audbiarnar faudur Arinbiarnar Fyrda(!) jarls. Þorgardr aatti Sundmæri(!) hans son var Þoruidr fadir Arnuidar treserkiabana faudur þeirra Slæuidar ok Braauidar. Griotgardr aatti Nordmæri hans son var Salgardr fadir Griotgardz fodur Solfa fodur Hogna i Niardey fodur Solfa vikings ok Hilldar hinnar miofu er atti Hiorleifr hinn kuensami. Haalfr berserkr var þeirra son. annar son Griotgardz var Sigarr fadir Sygnyiar(!) er aatti Haralldr Naumdæla jarl fadir Herlaugs faudur Griotgardz faudur Hakonar jarls faudur Sigurdar jarls faudur Hakonar Hladajarls. Raumr son Nors konungs tok riki eptir fedr sinn. hann aatti Aalfheima ok sua vitt riki sem aar þær falla er þar spretta vpp. þadan fellr Logrinn austan vm dal i Miors. enn þadan Vermaa i Raumelfui enn hon til siofar. af Vermaa fellr Raumaa ofan eftir Raumsdal. af Vermaa fellr Eystrielfr vm Eystridali ok i Vęni enn þadan Gautelfr til siofar. Raumr konungr aatti samdryckiu vm jol vid Bergfinn son Þryms iotuns af Vermaa ok geck þa i reckiu Bergdisar systur hans. ok eftir þat gat hon .iij. sona Biorn Brand ok Aalf. hann fostradi Bergfinnr ok var kalladr Finnaalfr. Biorn var med modur sinni ok var kalladr Jotunbiorn. Brand sendi hon Rauma faudur hans enn hann gaf hann gudunum ok var hann kalladr Gudbrandr. honum gaf Raumr konungr dali þa er Gudbrandzdalir heita. Jotunbirni gaf hann Raumsdal enn Aalfi Eystridali ok allt fyrir nordan Vęni ok fra Gautelfui ok nordr til Raumelfar. þat voru þa kalladir Alfheimar. Gudbrandr Dalakonungr var fadir Audleifs fodur Gudmundar konungs. hans son var Gudbrandr er ei villdi laata kalla sik konung ok let gefa ser jarls nafn fyrir þui at hann villdi vera rikazstr jarl a Nordrlondum. hans son var Geirmundr jarl fadir Rodgeirs jarls faudur Gudbrandz er ei villdi vera konungr ne jarl ok let gefa ser hersis nafn ok reed þo londum sem konungr | ok at engu var hann vrikari. hans allir ættmenn voru siþan hersar. Jotunbiorn hinn gamli var fadir Raums konungs fodur Hrossbiarnar faudur Orms skeliamola faudur Knattar fodur þeirra Þorolfs haalma ok Ketils raums. Synir Þorolfs voru þeir Helgi fadir Bersa fodur Þormods faudur Þorlaugar modur Tunguoddz. Finnaalfr hinn gamli feck Suanhilldar er kollut var gullfiỏdr. hon var dottir Dags Dellings sunar ok Solar dottur Mundilfara. sonr þeirra var Suanr hinn raudi fadir Sæfara faudur Vlfs faudur Aalfs faudur þeirra Jngimundar ok Eysteins. Raumr hinn gamli feck sidar Hilldar dottur Gudraudar hins gamla sonar Solua konungs er fystr ruddi þar sem nu heita Soleyiar. enn synir hans voru þeir Gudrỏdr Haukr Haddingr ok Hringr. Gudrỏdr var konungr eftir fedr sinn ok konungar voru allir hans ættmenn. Eysteinn illraadi var hans son. hann setti Jnnþrændum hund sinn fyrir konung er Saurr het fyrir þat er þeir hofdu drepit Aunund son hans er hann hafdi þar sett til landzgæzslu.

---

Fotnoter: