Maríu jartegnir - Frá nunnu einni

Fra heimskringla.no
Hopp til navigering Hopp til søk
Velg språk Norrønt Islandsk Norsk Dansk Svensk Færøysk
Denne teksten finnes på følgende språk ► Original.gif Dansk.gif


Noen spesialtegn vises ikke på iPhone/iPad.


Maríu jartegnir


Frá nunna einni


C. R. UNGER

Christiania 1871



B (Varianter fra A)

Frá nunna einni

Í nunnusetri einhveriu varð sá atburðr einnhvern dag, at nunna ein gékk frá[1] Maríu kirkiu, ok féll skúrfiöl[2] í höfuð henni, svá at [haussinn sprakk[3] í sundr fyrir trésendanum, ok vallt heilinn út or hausinum ok niðr á iörð. En þeir menn er hiá vóru, tóku heilann ok blóðit ok létu í munnlaug. En þá er at henni tók at líða, báru þeir hana til kirkiu ok svá heilann, þann er or [hausi hennar[4] hafði hrotit. Þeir lögðu hana niðr fyrir altari ok géngu brott allir frá henni. Þeir byrgðu hana þar, því at þeim þótti henni engi[5] ván lífs. En er þeir vóru brott gengnir, þá sýndiz henni María dróttning, hon gékk at henni ok þreifaði um höfuð henni. Síðan tók hon heilann ok blóðit, er í munnlaugunni[6] var, ok lagði í sárit. Hon tók yfir sik möttul nunnunnar, [ok breiddi síðan möttulinn yfir hana siálfa[7]. Þá hvarf María dróttning [brott at sýn[8]. En þeir menn kómu þar, er búa ætluðu um lík hennar, þeir sá, at hon lifði, ok urðu þeir því allfegnir[9]. Hon spratt upp ok sagði þeim [þat, at hon var heil ok gróin sár hennar. Hon sagði þeim[10] allan atburð þessar iartegnar, ok lofuðu allir guð ok sæla Maríu dróttning. Þeir tóku möttul þann[11] ok höfðu fyrir helgan dóm, ok verða þar margskyns[12] iartegnir af vatni því, er möttullinn er þveginn í.


St2

Nvnna ein dyrlig þenadi ꜳstsamliga hinne dyrligstv guds modr elskandi hana framaz allra heilagra manna. Enn þat bar vidr einn tima, er hun geck til kirkiv, at hun fell, ok uard fallit suo ogurlict, at hofudit kom ꜳ stein, ok lꜳ heilinn þegar uti. Þa koma adrar systr at henni ok vrdu hrygguar vidr, þotti þeim hun at bana komin, ok sꜹmnudu saman heilanum ok vildu bera hana til rums sins. Enn hun leiddi sialf med bendingv, at hun vildi til kirkiu borin vera. Ok var sva gert, ok var hun lꜹgd nidr fyrir altari, ok latin munnlꜹgin nidr hia henni, su sem i var heilinn. Enn þær fara brott ok ætludu, at hun mundi þar andaz. Enn brꜳtt eptir brautfor þeira rann haufgi med omegne ꜳ nunnuna. I þeim haufga vitradiz henni hin sæla mær Maria heilann takandi ok inn i hausinn leggiandi. Hvn tekr mottul nunnunnar breidandi yfir sik ok leggiandi sidan aptr yf(ir) nunnuna. Þa snyr hun brot. Enn þeir menn kvomu, er ætludu at bua um lik nunnunnar. Þeir sa, at hun lifdi ok uar alheil, ok sagdi hun þeim med fagnadi allan atburd þessarrar iarteinar, ok lofudu allir gud ok sæla Mariam. Þeir toku mottulinn, er drotningin breiddi ꜳ nunnuna, ok hofdu fyrir helgan dom, ok verda margskyns iarteinir af uatni þui, er mottullinn er þueginn i.




Fotnoter:

  1. í A.
  2. nökkur tilf. A.
  3. [þar sprakk haussinn hennar A.
  4. [hausinum A.
  5. eigi A.
  6. munnlauginni A.
  7. [en síðan breiddi hon hann yfir hana A.
  8. [á braut A.
  9. allir fegnir A.
  10. [tilf. A.
  11. er dróttning breiddi á nunnuna tilf. A.
  12. margar A.