Or Kristnisögu meistara Adams

Fra heimskringla.no
Revisjon per 22. jun. 2019 kl. 10:29 av August (diskusjon | bidrag) (Or Kristnisögu meistara Adams)
(diff) ← Eldre revisjon | Nåværende revisjon (diff) | Nyere revisjon → (diff)
Hopp til navigering Hopp til søk
Velg språk Norrønt Islandsk Norsk Dansk Svensk Færøysk
Denne teksten finnes på følgende språk ► Original.gif
Original.gif


Flateyjarbók


Or kristnisögu meistara Adams


[Or Hamborgar historiu]


Capitulum

Sva segir i Hamborgar ystoria. ok kallaz sa meistari er gert hefir bokina[1] flest hafa ritad eftir fyrirsaugn Sueins konungs Vlfssonar af tidendum Dana ok Suia. at Otto keisari hinn raudi enn fyrsti med þij nafni þa er hann hafdi aptr vnnit aull þau riki vndir keisaradominn sem vndan hofdu gengit siþan Karlamagnus keisari andadizst. þa for hann med her vpp aa Dani a tolfta aari rikis sins. ok þegar hann kom nordr vm Slesvik þar sem Danmork tok til eftir þui sem þeir hofdu |[2] laundum skipt Heinrekr keisari fadir hans ok Gormr konungr gamli i sætt sinni. eyddi hann landit med elldi ok iarnum huar sem hann kom allt þar til er hann kom þar sem siþan heita Ottusund. Siþan sneriz hann sudr aptr. ok þa er hann kom til Slesvikr kom i mot honum Haralldr Gormsson ok hellt orrostu vid hann ok vard sigradr ok flydi til skipa. Eptir þat gaf hann sik i keisara valld ok feck keisarinn honum aptr riki sitt ok het Haralldr at laata skirazst ok at cristna alla Danmork. var þa Haralldr kdunngr skirdr ok kona hans Gunnhilldr drottning ok son hennar vngr er keisari veitti gudssifiar ok let kalla Suein Otto. Þa var skipt Jotlandi i þriu byskups riki ok vigdi Adaldagr erchibyskup or Brimum þria byskupa. Haralld i Slesvik. Leifdag til Ripa. Reginbrand til Aarós. Haralldr konungr blatonn hellt vel tru sina medan hann lifdi. Hann sendi son sinn til Englandz þann er Ringr het med her. þui at Danir hofdu hafdt þar valld hundrat vetra siþan Gudraudr vann England. ok er Ringr hafdi vnnit landit var hann suikinn af Nordimbrum. Haralldr konungr kom ok Hakoni blotiarli til Noregs rikis er aadr var burt rekinn ok gerdi hann saattan vid cristna menn. Enn þa er Haralldr konungr elldiz villdi Sueinn son hans taka riki af honum. styrktu hann til þess þeir hofdingiar er Haralldr konungr hafdi naudgat til cristni. toku þeir Suein til konungs enn kaustudu cristni. þeir laugdu bardaga vid Haralld konung. konungr for til orrostu naudigr i mot syni sinum. sua sem David i mot Absaloni. Or þessi orrostu flydi Haralldr konungr miok saarr til Vindlandz ok andadiz i Jomsborg aa allra heilagra messudag. lik hans var flutt til Roiskelldu ok iardadr(!) i Cristz kirkiu þeirri er hann let sialfr gera. hann var konungr fim tigi aara. Eptir Haralld konung blataunn tok riki Sueinn son hans ok hellt illa cristni. hann var hertekinn tuo tima af Vindum ok leystr vt siþan med miklu fe. Eirekr hinn sigrsæli Suiakonungr kom i Danmork med allmikinn her ok bardiz vid Suein konung margar orrostur aa skipum þar til er minkadi styrk Dana. sua at Sueinn vard landflotti ok flydi fyst til Noregs ok villdu Nordmenn ecki vid honum taka. for hann þadan til Englandz ok villdi Adalradr konungr ecki vid honum taka sakir ofridar þess er Danir hofdu þar iafnan gert. eptir þat for hann til Skotlandz ok tok Skotakonungr vel vid honum. var hann þar til dauda Eireks konungs. Sua hefir Sueinn konungr Vlfsson sagt at Sueinn konungr modurfadir hans tæki makliga hefnd fyrir þat er hann hafnadi rettum gudi er fadir hans (hafdi) tignat. Eirekr konungr red bædi Suium ok Daunum ok var heidinn ok vvin cristinna manna. þa heriadi Otto keisari hinn þridi med þij nafni i Danmork ok sigradi Eirek konung.

Keisarinn hafdi sent þangat Poppo byskup af Slesvik at boda Eireki konungi cristni. enn konungr bad byskup syna ser nockurn maatt guds sins. þa bar byskup gloanda iarn i hendi ser ok syndi konungi vbrunna haund sina. ok aadr allan grun tæki af heidnum monnum let byskup vexa kyrtil sinn ok for i. let siþan sla i elldi. stod hann heill þa er kyrtillinn var brunninn. eftir þat let Eirekr skirazst ok morg þushundrat manna. Þa voru sendir menn til Suiþiodar at boda cristni. enn Sueinn konungr Vlfs son segir suo. at Eirekr konungr hafi kastad cristni ok dait heidinn. J þessum vfridi hefir verit Hakon iarl sem segir i Vellheklu ok veitt lid Eireki konungi magi sinum. Eptir Eirek konung tok riki i Suiþiod Olafr son hans. Sueinn for þa aptr i Danmork. hann skildi þa at gud var honum reidr ok het at snuaz til cristni ok boda retta tru. Eptir þat sættuz þeir Olafr konungr ok Sueinn konungr sua at Sueinn konungr skylldi hafa riki sitt ok fa Sigridar ennar storraadu modur Olafs konungs. siþan skylldu þeir baadir laata cristna laund sin. siþan eggiadi Sigridr en storraada at þeir skylldi raada fra londum Olaaf Trygguason er Danir kaulludu krakalegg edr krakabein sem þeir gerdu siþan. skiptu þeir þa Noregi med ser þrir hofþingiar Olafr suæinski(!) Sueinn konungr ok Eirekr iarl Hakonar son.




Fotnoter:

  1. ok tilf. Cd.
  2. 6