Ættartölur (Flateyjarbók)

Fra heimskringla.no
Revisjon per 10. jun. 2020 kl. 07:42 av August (diskusjon | bidrag) (Erstattet OldNordicTimes med HTML-koder)
(diff) ← Eldre revisjon | Nåværende revisjon (diff) | Nyere revisjon → (diff)
Hopp til navigering Hopp til søk
Velg språk Norrønt Islandsk Norsk Dansk Svensk Færøysk
Denne teksten finnes på følgende språk ► Original.gif
Original.gif


Flateyjarbók


[Ættartỏlur]


Ættartala fra Haud

Haudr aatti þar riki er kallat er Hadaland. hans son var Hoddbroddr fadir Rolfs faudur Romundar berserks faudur þeirra Hamundar Haka ok Gunnhladar modur þeirra Vtsteins ok Jnnsteins. Hamundr var Hỏrda jarl hann var fadir Hroks hins suarta ok Hroks hins huita. Haki var fadir Hrodgeirs faudur Hrodmars faudur Haka berserks. Gunnlaud var dottir Hroks hins suarta enn modir Hromundar Gripssunar. Haddingr son Rauma aatti Haddingiadal ok Þelamork. hans son var Haddingr fadir Haddings faudur Hỏgna ens rauda. eftir hann toku riki Haddingiar .iij. ok var huerr þeirra eftir annann. Helgi Haddingiaskati var med einum þeirra. Hringr konungr son Rauma aatti Hringariki ok Valldres. hann feck dottur Vifils sækonungs. þeirra son var Haalfdan gamli. ok þa er hann tok konungdom gerdi hann blot mikit at midium vetri ok blotadi til þess at hann skylldi mega lifa .ccc. vetra i konungdomi sinum sem sagt var at lifat hafdi Snærr hinn gamli. enn frettin sagdi honum sua at hann mundi lifa ecki meirr enn einn mannzalldr. enn þat mundi vera .ccc. vetra[1] at eingi mundi vera vtiginn madr i hans ætt ok engi kona. hann var hermadr mikill ok heriadi vida vm Austrveg. þar drap hann þann konung er Sigtryggr het i einvigi. hann geck at eiga Alfnyia dottur Eymundar konungs or Holmgardi. þau attu ix sonu. het einn Þeingill. er kalladr var mannaþeingill. Ræsir Gramr Gylfi Hilmir Jofurr Tiggi Skyli ok Harri. þessir .ix. er sagt at allir væri iafngamlir ok vrdu sua agætir at i ollum frædum eru þeirra nofn hofd fyrir tignar naufn ok konunga nofn. sua er sagt at engi þeirra ætti born ok fellu allir senn i orrosto. Enn attu þua adra .ix. sonu. hetu þeir Hilldir Næfill Audi Skelfir Dagr Bragi Budli Lofdi Sigarr. Hilldir Sigarr ok Lofdi voru allir herkonungar. Audi Budli ok Næfill voru sækonungar. Dagr Skelfir ok Bragi saatu at londum. Dagr aatti Þoru dreingiamodur ok aattu þua .ix. sona. het einn Oli annarr Ámr .iij. Jofurr fiordi Arngrimr. Oli var fadir Dags faudur Oleifs faudur Hrings faudur Olaafs faudur Helga faudur Sigurdar hiartar faudur Ragnhilldar modur Haralldz hins haarfagra. su ætt Haralldz var kollud Dỏglingar. Arngrimr aatti Eyfuru þeirra son var Angantyr berserkr. Bragi gamli var konungr a Valldresi. hann var fadir Agnars faudur Aalfs faudur Eireks faudur Hilldar modur Halfdanar ens millda faudur Gudraudar faudur Halfdanar suarta faudur Haralldz hins haarfagra. þessi ætt Haralldz heita Bragningar. Skelfir var konungr a Vaurs. hans son var Skiolldr fadir Eireks faudur Alreks faudur Eireks hins maalspaka faudur Alreks hins frækna faudur Vikars faudur Vatnars faudur þeirra Jmalldz ok Eireks faudur Gyda er aatti Haralldr hinn haarfagri. þat heitir Skilfinga ætt edr Skiolldunga ætt. Hilldir var enn .v. sun Dags. hann var fadir Hilldibrandz faudur Vigbrandz faudur Hilldis ok Herbrandz faudur Haralldz ens gręnska faudur Asu hinnar storraadu modur Halfdanar suarta faudur Haralldz hins haarfagra. Sigarr var fadir Siggeirs er atti Signyiu dottur Vaulsangs konungs. Sigarr var ok fadir Sigmundar er atti Hilldi dottur Griotgardz konungs af Mæri. hans son het Sigarr fadir Signyiar. hann let heingia Hagbard. þat heitir Siklinga ætt. Lofdi var konungr mikill. þat herlid er honum fylgdi ero Lofdar kalladir. hann heriadi a Reidgotaland ok vard þar konungr. hans synir voru þeir Skeckill sækonungr ok Skyli fadir Egdis faudur Hialmþiers faudur Eylima faudur Hiordisar modur Sigurdar fafnisbana faudur Aaslaugar modur Sigurdar orms i auga faudur Aaslaugar modur Sigurdar hiartar faudur Ragnhilldar modur Haralldz hins haarfagra. þessir ættmenn Haralldz eru kalladir Lofdungar. Audi ok Budli voru sækonungar ok foru baadir saman med her sinn. þeir komu med lidi sinu til Saxlandz ok heriuda þar vida. logdu vndir sik Valland ok Saxland settuz þar at londum. Audi hafdi Valland ok var fadir Froda faudur Kiars faudur Aulrunar. þat eru kalladir Audlingar. Budli hafdi Saxland. hann var fadir Attils faudur Vifils faudur [Læ]fua faudur Budla faudur Saurla edr Serla ok Atla ok Brynhilldar modur Aaslaugur. ok er su ætt Haralldz hins haarfagra kollud Budlungar. Næfuill konungr var fadir Heimars. faudur Eynefs faudur [R]aku faudur Giuka faudur þeirra Gunnars ok Haugna Gudrunar Gudnyiar ok Gullrandar ok er þat kaullud Niflungaætt. Nu eru taldar konur þær er fyst komu i ætt Halfdanar gamla. enn þa er hin fysta kona kom i ættina var lidit .ccc. vetra fra blotinu er Halfdan blotadi til alldrs ser ok rikis.


Ættartala

Alfr konungr hinn gamli reed fyrir Aalfheimum. hann var fadir Aalfgeirs faudur Gandaalfs faudur Aalfhilldar. Alfhilldr var modir Ragnars lodbrokar faudur Sigurdar orms i auga faudur Aslaugar modur Sigurdar hiartar faudur Ragnhilldar modur Haralldz hins haarfagra. Haralldr hinn gamli son Valldars hins millda Hroarssunar atti Heruauru Heidreks dottur konungs. þeirra son var Halfdan snialli fadir Juars vidfadma faudur Audar innar diupaudgu. hana atti Hrærekr slaunguanbaugi. þeirra son var Haralidr hillditaunn. sidarr aatti Audi Radbardr konungr. þeirra son var Randuerr fadir Sigurdar rings faudur Ragnars lodbrokar faudur Sigurdar faudur Aslaugur modur Sigurdar faudur Ragnhilldar modur Haralldz hins haarfagra er fystr var einvalldzkonungr yfir Noregi.


Ættartala Haralldz fra Odni

Burri hefir konungr heitid er reed fyrir Tyrklandi. hans son var Burs er var fadir Odins Aasakonungs faudur Freyrs faudur Niardar faudur Freyrs faudur Fiolnis faudur Sueigdis faudur Vandlanda faudur Visburs faudur Domallda faudur Domars faudur Dyggua. er ver kollum Tryggua. faudur Dags faudur Agna skialfarbonda faudur Alreks faudur Yngua faudur Jormunfroda. er ver kollum Jorund. faudur Ana ens gamla. er ver kaullum Aun. er .ix. vetr drack horn fyrir elli sakir aadr hann do. Aunn var fadir Eigils Tunnadolgs faudur Ottars uandilskraaku faudur Adils at Vppsolum faudur Eysteins faudur Ynguars hins haara faudur Brautaunundar faudur Jngialldz ens illraada faudur Olafs tretelgiu faudur Haalfdanar huitbeins faudur Eysteins faudur Halfdnar ens millda ok matarilla faudur Gudraudar veidikonungs faudur Halfdanar suarta faudur Haralldz hins harfagra.

Erik Werenskiold:
Ana ens gamla. er ver kaullum Aun. er .ix. vetr drack horn fyrir elli sakir aadr hann do.


Ættartala

Skiolldr het son Odins Aasakonungs. hann var fadir Fridleifs faudur Fridfroda faudur Fridleifs faudur Hauardz ens handramma faudur Froda faudur Vermundar ens vitra faudur Olafs ens litillaata faudur Dans ens mikillata faudur Froda ens fridsama faudur Fridleifs faudur Froda ens frækna faudur Jngialldz Starkadar fostra faudur Hræreks hnaugguanbauga faudur Halfdanar faudur Hræreks slaunguanbauga faudur Haralldz hillditannar. brodir Haralldz var Randuerr fadir Sigurdar hrings. er þa slik ættartala til Haralldz konungs haarfagra sem fyrr segir.


Ætt Haralldz fra Adam

Adam skapadi gud fyst allra manna. Seth var son hans. hans son Enos. hans son Kaynaan. hans son Malaleel. hans son Pharett. hans son Enoch. hans son Mathusalem hinn gamle. hans son Laamech. þa var vti enn fysti heimsalldr. hans son var Noe er aurkina smidadi. hans son Japhet. hans son Japhan. hans son Zechim. hans sun Ciprus. hans son Cretus edr Celius. hans son Saturnus i Krit. hans son Jupiter. hans son Darius. hans son Erichonius. hans son Troeg. hans son Jlus. hans son Lamidon. hans son Priamus hofudkonungr. Munnon eda Mennon het konungr i Troio hann atti Troaanam dottur Priami konungs. hans son het Tror er ver kollum Þỏr. hans son var Loricha er ver kollum Hlorida. hans (son) Eredei er ver kollum Eindrida. hans son Vingiþorr. hans son Vinginer. hans son Modi. hans son Maagi er ver kollum Magna. hans son Seseph. hans son Beduigg. hans son Atra. hans son Trinaan. hans son Heremoth er ver kollum Hermod. hans son Skialldin er ver kollum Skiolld. hans son Beaf er ver kollum Biar. hans son Godolfr. hans son Burri er ver kollum Finn. hans son Frialafr er ver kollum Bors. hans son Voden er ver kollum Odinn. hann var Tyrkiakonungr. hans son Skiolldr. hans son Fridleifr. hans son Fridfrodi. hans son Herleifr. hans son Hauar enn handrammi. hans son Frodi. hans son Vemundr enn vitri. hans dottir Olof. hon var modir Froda ens fridsama. hans son Fridleifr. hans son Frodi enn frækni. hans son Halfdan. hans son Hroar. hans son Valldar enn milldi. hans son Haralldr gamli. hans son Halfdan snialli. hans son Juarr vidfadmi. hans dottir Audr en diupaudga. hennar son Randuerr. hans son Sigurdr hringr. hans son Ragnar lodbrok. hans son Sigurd(r) ormr i auga. hans dottir Aslaug. hennar son Sigurdr hiortr. hans dottir Ragnhilldr. hennar son Haralldr konungr hinn haarfagri. verdr þessi tala einum manni faatt i siau tughu at medtauldum bædi Adam ok Haralldi.


Huerir konungar styrt hafa Noregi.

Svn Haralldz haarfagra het Sigurdr hrisi. hans son Halfdan. hans son Sigurdr syr. hans son Haralldr hinn hardraadi brodir Olaafs ens helga. hans son Olaafr kyrri. hans son Magnus berbeinn. hans son Haralldr gilli. hans son Sigurdr munnr. hans son Suerrir magnus. hans son Hakon harmdaudi. hans son Hakon gamli. hans son Magnus er logbok sendi til Jslandz þa er kollud er Jonsbok. hans son Hakon haaleggr. hans dottir Jngibiorg. hennar son Magnus godi Eireks son langa hertuga. hans son Hakon. hans son Olafr er þa var .x. vetra er fadir hans andadiz. hann var konungr yfir Noregi Danmark ok aullum þeim skattlondum er þar liggia til ok rettr erfingi alls Suiarikis er Albrikt son Mækinborgar greifa hellt. hann var systrson Magnus konungs goda faudurfaudur Olaafs. Þessi Olafr var heitinn eptir hinum heilaga Olafi konungi Haralldzsyni eftir sialfs hans tilvisan. hann var þa konungr er sia bok var skrifud. þa var lidit fra higatburd vars herra Jesu Cristi .m.ccc.lxxx. ok .vij. aar.


Capitulum

Þessir hafa styrt Noregi. Olafr konungr sem nu sagdi. þa Hakon konungr. þa Magnus konungr godi. þa Hakon haaleggr. þa Eirekr ok Magnus. þa Magnus er bokina setti. þa Hakon vngi iafnfram Hakoni gamla faudur sinum. þa Jngi Baardarson ok Erlingr steinveggr ok Philippus Baglakonungr. þa Hakon harmdaudi. þa Suerrir magnus ok margr lygikonungr vm hans daga. þa Magnus Erlingsson ok Eysteinn birkibeinn. þa Hakon herdibreidr. þa Jngi krypplingr ok Eysteinn ok Sigurdr munnr. þa Haralldr gillikristr ok Magnus blindi ok Sigurdr slembidiakn. þa Sigurdr Jorsalafari Eysteinn ok Olafr. þa Magnus berbeinn ok Hakon Þorisfostri. þa Olafr enn kyrri ok Magnus fadir Hakonar Þorisfostra. þa Haralldr hinn hardraadi. þa Magnus enn riki son Olafs ens helga. þa oforsyniukonungr Sueinn Alfiuuson ok Knutr enn riki. þa Olafr hinn helgi Haralldz son. þa Eirekr jarl Sueinn jarl ok Hakon jarl. þa Olafr Tryggua son. þa Hakon blotjarl enn riki. þa Haralldr grafelldr. þa Hakon Adalsteinsfostri. þa Eirekr blodaux. þa Haralldr hinn haarfagri er fystr var einvalldzkonungr yfir ollum Noregi sua at sogur finniz til.


Huarf Olafs Hakonar sonar

Ari sidar enn fyrr segir huarf Olafr konungr Hakonar son. sogdu Danir hann daudann enn Nordmenn villdu ecki trua þui. Þa var tekin til rikisstiornar yfir Noreg ok Danmork drottning Margreta modir Olafs konungs enn dottir Valldamars Danakonungs eptir er hon let fanga Albrict.




Fotnote:

  1. ok tilf. Cod.