Maríu jartegnir - Vor frv gaf konu aptr vit sitt
D
Ein kona, husfrv riddara þess er Rotegarus het, dreymdi þann drỏm, at hun þottizt bera eitt merki suo rautt sem blod. Hun var þa olett at sueinbarni. Sem hun vaknar, missir hun skiotliga sins vitz, ok tok at tala ymissliga hluti. Hennar bondi vndrazt þetta miok. Eptir litinn tima segizt hun sia, at su kristilig tru, sem hun hefir þar til haft fyrr, var i milli hennar briosta ok for þar ut. Spottadi diofullinn suo þessa konu, huerrar ond hann hugdizt til sin skylldu hafa. Hennar vinir baru mikinn angr sakir þessarrar ohamingiu, sem henni hafdi til borit, þeir færa hana til margra heilagra stada, væntandi at hun mætti fa aptr sina heilsu. Hun vakti ok i kirkiu heilagrar þrenningar i þeim stad, er Fuscanum heitir. Enn heilog þrenning, þat er einn gud i þrimr personis, villdi eigi þar veita henni heilsu, enn hann villdi þann heidr veita himinrikis drottningu guds modur Marie. Þessi konu var gefit þat vatn af morgum prestum, sem vigt var med morgum særingum ok helgat med morgum blezunum, enn sidan þat kom ꜳ hana, æstizt þar vid miok hennar krankleiki, ok vard hun sidan miklu odari. Sidan eitt ꜳr var lidit, sidan hun fell i þenna krankleika, er hun flutt til kirkiu heilagrar Marie fyrir festum purificacionis. Þa kirkiu smidudu fordum Grickir, at þvi sem segizt, i midium einum storum skogi, er hun miok olik odrum kirkium at smid ok vidrkvæmilig heremitis. Hun vakir þar vm nottina ꜳ fyrr sagdri hatid ok vard suo heil fyrir verdleik þeirar helguztu iungfrvr, sem hun hefdi alldri þolt þa illu sott, þuiat hennar vit kom fullkomliga aptr, suo var ok hofudit vel heillt. Sialf hun ok hennar bondi ok allir þeira vinir lofudu gud ok hans modur Mariam fyrir þessa iarteign.
