Ólafsríma Haraldssonar

Velg språk	Norrønt	Islandsk	Norsk	Dansk	Svensk	Færøysk
Denne teksten finnes på følgende språk ►

Flateyjarbók

Olafsrima Haraldzsonar

er Einarr Gilsson quad

Theodor Kittelsen:
Hellige Olaf

1.

Olafr kongr aurr ok fridr

aatti Noregi at raada.

gramr var æ vid bragna blidr

borinn til sigrs ok naada.

2.

Daugling hellt sua dyrann heidr

drottni himna hallar.

eingi sky(r)ir aurfa meidr

audlings frægdir allar.

3.

Millding hafdi mentir þær

er mestar voru i heime.

huergi frægra hilmi fær

huorki af gledi ne seime.

4.

Fimm hefir kongr cristnat laund

kann ek oll at nefna.

gramr vill iafnan rioda raund

ok rangan vsid hefna.

5.

Raan ok stuldi refsti hann

ok ræktar stiorn i landi.

hilmir lagdi a heidni bann

ok hefndi stort med brandi.

6.

Gramr nam laugmaal setia sua

at seggir þoll(d)u valla.

daligan let hann dauda faa

drottins suikara alla.

7.

Reckar yfduz ræsi aa mot

ok retti hardla saunnum.

voru kongi heimsklig hot

hafuin af sialfs sins monnum.

8.

Haarekr var fyrir brognum bystr

buinn at strida stilli.

Þorir hundr er þann veg lystr

þridi var Kaalfr enn illi.

9.

Kalfr var fyrr med kongi saa

kærr i ollum raadum.

nu er hann horfinn hilmi fra

heidri suipptr ok daadum.

10.

Þrændir gengu Þori aa haund

þeim var liuft at heria.

haaleysk þiod vill rioda raund

ok rikit kongi veria.

11.

Fylkir rikr frægr ok milldr

frettir safnat þenna.

þa vill hilmir hraustr ok gilldr

huergi vndan renna.

12.

Bragning lætr byria ferd

bonda múg i moti.

hann vill iafnan hræra suerd

ok herda skot med spioti.

13.

Sikling hafdi safnat þa

sinum gaurpum sniollum.

lofdungs kann ek lydi at tia

langt bar gramr af aullum.

14.

Hlyri kongs var hardla iungr

hann vil ek fystann nefna.

vist nam Haralldr þyckiu þungr

Þrændum strid at hefna.

15.

Get ek ei hrotta hauggit raund

Haralldr talar vid garpa.

bindi menn vid mina haund

mæki þann enn snarpa.

16.

Raugnualldr var milldr ok merkr

med þeim kongi goda.

Brusa sun nam brigda sterkr

brand i dreyra at rioda.

17.

Finnr Arnasun frækn ok hraustr

fylgir iofri sterkum.

Biorn stallari tryggr ok traustr

trur vel ræsi merkum.

18.

Sa var annar Aarna maugr

ytar Þorberg kalla.

hann leet staalin stinn ok faugr

i sterkum hlifum gialla.

19.

Þormodr var vid Kolbrun kendr

kongsins skaalldit dyra.

sa bar huassar hyggiu strendr

huar sem garpar strida.

20.

Naaduz menn i niflungs flock

nær sem risar at lita.

þeir hafa bragnar bryniu rock

brandi skorit enn huita.

21.

Gengu fram fyrir kongsins kne

ok kuoddu stilli enn teita.

budu þeir bædi fylgd ok fee

frægum siola at veita.

22.

Grams reed spyria garpa þa

gerit mer heiti at inna.

tru skulu greina seggir sua

at satt megi til þess finna.

23.

Oft hafa þegnar þriozsku hefnt

þat mun eingi lasta.

Gaukaþori hafa gumnar nefnt

gladann ok Hafrafasta.

24.

Treystum ver aa maat ok megn

er margann riddara prydir.

aungua hafa af aasum fregn

ỏckrir sterkir lydir.

25.

Taki þer helldr helga tru

himna kongs med bloma.

virdar kastit villu nu

ok verit med oss i soma.

26.

Lydir gerdu lykt aa þij

at leysa þenna vanda.

skirnar brunn fara skatnar i

ok skynda gudi til handa.

27.

Þrekstorr kom til þeingils madr

þann fra ek Arnliot heita.

tok hann skirn ok geck þo gladr

grams i flockinn teita.

28.

Garpar fleiri at fylki renn

| enn fyrdar mega þat telia.

siklingr nam sæmdar menn

ser til lids at velia.

29.

Kaalfr hafdi muga mannz

merkta vaullu vida.

nidingligt var nærsta hans

niflung þeim at strida.

30.

Biaalfua klæddiz haurdum Hundr

ok hans sueitungar margir.

þat hafua geysi grimligt vndr

gert bufinnar argir.

31.

Ræsir talar vid Þorgils þa

þat var mest af prydi.

þer vil ek silfr i siodi faa

þu sed med auma lydi.

32.

Þorgils hugsar þeingils maal

þer innit framar hoti.

gef fyrir þeirra garpa saal

er ganga oss i moti.

33.

Herrinn drifr aa hilmis fund

at heyja imỏn stranga.

sua var þrutin þeirra lund

at þraut vard fram at ganga.

34.

Muginn þessi geysiz gegn

gram med saarum vilia.

laugdu aa orku ok allt sitt megn

iofur vid land at skilia.

35.

A Stiklastaudum var roman remd

rikum kongi i moti.

þar voru skaupt med haundum hremd

ok haurdu kastad grioti.

36.

Haarekr eggiar herlid sitt

heitr mỏrgum soma.

luki garpar geysi strit

gram fyrir harda doma.

37.

Goda suerdit Hneitir het

hafdi gramr til viga.

þar fyrir margan þeingill let

þegn at iordu hniga.

38.

Gumnar hlaupa geystir fram

grams fyrir merkit væna.

reisa þanneg randa glam

ok rista skiolldu græna.

39.

Gellini tok at geysaz hart

ok gerdi romu stranga.

sannliga let hann seggia mart

saarann dauda fanga.

40.

Arna synir sinn vnda nadr

einart drogu af magni.

kendiz ei sua klokr madr

kæmi hlif at gagni.

41.

Þormodr nam brytia braad

bleikum faalu hesti.

vardi kong med dygd ok daad

darra eel hann huesti.

42.

Þorir hundr þrautar gilldr

þreif sitt spiotid snarpa.

laga var hann ok hauggua milldr

vid harda kongsins garpa.

43.

Þorsteinn het sa er Þori vidr

þar nam fram at ganga.

sa var kendr knarrarsmidr

kominn i villu stranga.

44.

Kongrin hio til Þoris þa

þat fra ek vndrum sætti.

ecki beit hans biaalfann aa

bratt sem grioti mætti.

45.

Biorn stallari bystr ok reidr

bardi Hund i moti.

siþan hne vid sannan heidr

seggr a Þoris spioti.

46.

Þorgeirr vod i randa regn

ræsi naadi at finna.

snarr reed kongr þriozskum þegn

þessi ord at inna.

47.

Þeygi gerir þu Þorgeir reet

at þreyngir monnum minum.

lypta ek þer af laagri stett

lokit mun sigri þinum.

48.

Kongrin hio med Hneiti þaa

sua hraud af eggium baadum.

Þorgeir daudr a lyngi laa

lifui suiptr ok daadum.

49.

Þorsteinn reed a þeingils kne

þunnri auxi at snida.

siþan leet hann lif(!) fior med fee

ok fell i anaud strida.

50.

Biortum varp ser brandi fra

budlungs haundin mæta.

sioli bad med saunnu þa

sialfann gud sin giæta.

51.

Þorir lagdi i kongsins kuid

kaulldum snotar raadum.

hilmis saal tok hæstann frid

himna grams med naadum.

52.

Kaalfr hio til bragnings bystr

batt ser þungan vanda.

ramliga var hann aa reidi lystr

ræsi þeim at granda.

53.

Myrkri slo yfir menn ok hiord

vid milldings dyran dauda.

litu þa huarki laug ne iord

lyd aflar þat nauda.

54.

Þa kom Dagr med dreingi sin

darra þing at heyia.

margr hlaut vid mikla pin

madr af sut at deyia.

55.

Æsilig var odda hrid

vndrum fra ek þat gegna.

maatti ecki meira strid

af maalma leiki fregna.

56.

Hrædilig var hiorfa gnaud

hardar bryniur sprungu.

dreingir fengu dapra naud

daurr aa hlifum sungu.

57.

Stort var þetta manna mot

mest kom hialp til bragna.

daufir fengu ok blindir bot

biugir heilsu fagna.

58.

Þorgils geymdi þeingils lik

þat for helldr af hliodi.

madr tok syn fyrir merkin slik

af mætu kongsins blodi.

59.

Froni er huldr fylkir mætr

firdr naud ok grandi.

likami kongs var milldr ok mætr

manudr .xij. i sandi.

60.

Þeim kom virdum vondzlig þraut

at visis fengu reidi.

geislar skinu vm grund aa braut

grams af dyru leidi.

61.

Lydir toku vpp likama hans

lutu þa kongi sniollum

haar ok negl var heilags mannz

haatt at vexti ollum.

62.

Hilldings taka þa helgann dom

halir i skrin at leggia.

nu er Kristz et biarta blom

ok bliduz miskunn seggia.

63.

Drottni færdi audlingr ỏnd

ytum likam selldi.

nu er hann guds aa hægri hỏnd

himens i æzsta velldi.

64.

Budlungs heidr er biartr ok rikr

bædi vm laund ok geima.

gæddiz engi fylkir slikr

fyrri nordr i heima.

65.

Reidz þu ei þo þeingill þer

þyrda ek visu at bioda.

bidr ek Olaaf biarga mer

vid bragning allra þioda.

---

Fotnoter: