Maríu jartegnir - Af riddara einum
| Velg språk | Norrønt | Islandsk | Norsk | Dansk | Svensk | Færøysk |
|---|---|---|---|---|---|---|
| Denne teksten finnes på følgende språk ► |  |
Innhold
655i og E
Af riddara einum
I einu þorpe, þui sem til heyrir þeira borg er Petragoris heitir, uar nockr riddara, er utlendis fystizt at fara ok sækia ut yfir hafit til Jorsala at uitia heilaga stadi guds. Ok ꜳ uidrkuæmiligum tima fer hann ok framm kemur i Jorsali, dueliandizt þar um nockrn tima. Sidann uitiar hann marga stadi uorrar fru sancte Marie ok annara guds uina, einkannliga giorir hann sina ferd til þeirar guds modur kirkiu, er stendr in Ualle Josaphat, hver smidut er med einkannligum hagleik, blomgandizt af likamligum grepti sialfrar Marie drottningar, þviat allri kristni er uel kunnikt, at hun signut andadizt in Vallis Josaphath, ok grafin i fyr nefndri kirkiu, ok hier med er kunnikt af annare halfu, at hennar likami er brotthafinn.
Sem riddarinn hefir sagda stadi vitiat, uendir hann[1] aptr sinni ferð heim komandi i sitt fostrland. Ok eptir nokkvrn tima liðinn sækir hann heim kirkiu varrar frv i Rothomador a nokkvrvm hatiðisdegi, hver stendr i nalægð við greinda borg Petragorem. I þessarri kirkiv ser riddarinn fleiri takn ok merkiligri lvti, en fyrr hefði hann i nokkvrri [gvðs moðvr[2] kirkiv þvilika eða[3] iafnhaleita sena. Hvar firir hann fylliz mikillar vhæfv i sinv hiarta, þat falsliga hvgsandi, at sva margar ok miklar iartegnir, sem þar hangandi teikn til visandi mvni með eingv moti firir gvðliga miskvnn vorðit hafa, eigi trvir hann þat satt vera, at þꜹ se af nokkvrvm[4] pilagrimvm eða oðrvm vtlendvm monnvm sakir dasamligra[5] stortakna þagat borin, helldr ætlar hann, þott eigi se miok goðmannliga, at þeir staðarins heimamenn[6], sem kirkivnni þiona dagliga, mvni firir sinn hegomligan kyndvgskap til þess gert hafa, at þvi meira offr mætti þar af þagat sækianda lyð við taka, [sem þat[7] viðara færi ok her a lioðaði, at i sogðvm stað gerðiz fleiri takn ok stormerkiligri en i oðrvm nalægvm stoðvm. En firir þa sok var hann sagða lvti mest hvgsandi, at honvm þotti þat harðla vndarligt, at þessi kirkia mvndi framarr pryðaz af gvðs moðvr iartegnagerð, en hennar vppnvmningarkirkia in Valle Josaphat, eða aðrir merkiligir staðir, þeir sem henni vorv helgaðir.
Nv sem riddarinn ferr brott af Rothomador heim vendandi til [sinna herbergia[8], hefir hann [sva sem[9] i fleymingi firir sinvm[10] kompanvm, at [klerkar kirkivnnar[11] i Rothomador se miok fegiarnir, þviat hann segiz vist vita, at morg þꜹ signa, sem þar tiaz, hafa þeir sialfir gert sakir [penga, sem[12] þvi fleiri sækti staðinn ok offraði sem mest. En þenna vmlestr ok vtrv lætr gvð drottinn ok hans sætasta moðir eigi leingi vpindan vera, þviat a greindan riddara fellr sa krankdomr [innan litils tima[13], at hans limir kreppaz [ok sinni þionastv fra verpaz[14], sva at hann verðr i stað kararmaðr. Ok[15] hann skilr at gvðlig reiði er komin ifir hann sakir þeirar smanar, sem[16] hann hefir veitt gvðs moðvr kirkiv [i Rothomador með sinvm orðvm ok atdrætti[17]. Þvi kallar hann til sin skynsama menn, iattandi með goðri iðran alla sina sekt, [vattandi opinberliga, at þat allt sem hann hafði talat vsæmiliga til gvðs moðvr kirkiv ok hennar klerka, tok hann af sinvm vandskap ok illmenzkv firir vtan sannindi allra skynsemda[18]. Eptir greinda iatning heyrir skiotliga hans bæn sv blezaða drotning, er einga firirlitning ma þeim veita, sem flyr vndir hennar fvllting[19], gerandi þenna riddara frialsan af [sinni reiði ok[20] ollvm krankdomi. Eptir liðna tva manaði vitiar hann siðan gvðs moðvr kirkiv með sannri goðfysi, boðandi hennar lof ok sæmd hverivm manni, þat a ser synandi, at sa er sæll verandi[21], sem eigi er i gvðs moðvr reiði fallandi[22].
D2
Riddari trvdi eigi iarteignvm
Riddari nockur af þeim stad, er Pectagoricensis heitir, for pilagrimsferd til Jorsalalandz at vitia grafar drottins ok annarra stada heilagra manna. Sem hann for aptr, kom hann til kirkiu heilagrar guds modur Marie de Rothemador, er skamt var fra hans veg, ok er hann sa þar suo morg teikn ok likneskiur med vax, at hann hafdi eigi suo margar iarteignir sed i Valle Josaphat i þeiri kirkiu, sem hvn var vppnumin til himna, ok eigi i nockurum odrum kirkium, suo margar sem hann hafdi sed fagrar ok sæmiligar guds modur helgadar, ok þui mistruir hann þessa hluti vera þangat flutta af vtlendvm monnum ok pilagrimvm, helldr segir hann, at sialfir þeir heima at kirkiunni hafa þa þangat fært med prett, at þeir fengi þui meiri peninga. Ok sem hann kemr heim, leitar hann med þessi skynsemi at gera fals þa hluti, sem sannir voru, ok allir menn sogdu ok vissu vm þær iarteignir, sem guds modir gerdi i þessi sinni kirkiu. Sakir þessa bar þat til, vondum monnum til hefndar enn godum monnum til heidrs, at allir limir fyrr sagds riddara bognudu, suo at hann vard kryppill. Hann kennizt þa vid sialfan sik, sem hann hafdi meirr enn tuo manadi verit pindr med þessum krankleika, ok idrazt fullkomliga sinnar otrv, at hann hafdi fyrirsmꜳd fyrr sagda kirkiu guds modur Marie, ok bidr ser myskunnar iatandi opinberliga, at kirkia himinrikis drottningar de Rothemador er af henni prydd ok tignud med allzkyns dygdum ok iarteignvm. I þessarri iatning ok goduilia styrkizt hann, ok losna knutar hans, suo at hans limir verda suo rettir, sem fyrr voru þeir, ok ris hann vpp styrkr ok heill, lofandi hina milldỏztu guds modur iungfru Mariam.
Fotnoter:
