Maríu jartegnir - Borgarmenn heingdu upp serk vorrar frv
| Velg språk | Norrønt | Islandsk | Norsk | Dansk | Svensk | Færøysk |
|---|---|---|---|---|---|---|
| Denne teksten finnes på følgende språk ► |  |
D (Varianter fra E)
Borgarmenn heingdu upp serk vorrar frv[1]
Swo segir meistara Gallterius[2], at þa er nær fimtan ꜳr woru lidin fra pinsl hins helga Jatmundar konungs i Einglandi, kom af Nordrhalfu heimsins sa iarl, er Hrolfr het. Ok sem hann hafdi sigrat Breta ok Flæmingia en brent þeira borgir ok kastala, kom hann til Cenomanniam ok sat vm stadinn. Hann sendi nockura hofdingia or sinum her til Turonsborgar, enn med guds forsio[3] mattu þeir eigi fram komast, þuiat Karhus[4] ok Ligeris toku suo mikinn voxt, at eigi matti yfir[5] komazt. Heriar hann þa vida annars stadar vm Franz. Þessi Hrolfr var kominn af [gofgum ættum[6] hinna fyrri Noregs hofdingia, enn sem Haralldr konungr rak hann sakir illuirkia ok hernadar brott af sinu[7] fostrlandi, hafdi hann mikinn her med ser. Fylgdu honum margir, þeir sem girntuzt at gripa annarra godz, ok suo hinir, er sakir sinna glæpa voru utlægir i sinu landi. Ok er hann hefir wida farit vm Franz med sinu lidi ok lagt vndir sik kastala ok borgir, enn drap kristid folk, settizt hann vm þa borg, er Carnotum heitir. Stadarfolkit treystizt[8] meirr myskunn lausnara vors Jesu Kristz ok hans modur Marie enn styrkum [murum eda vopna[9] afla, ok festu [sem merki[10] fyrir mur borgarinnar, þar sem brotinn var af hermonnum, serk vorrar frv, huern er Karolus Caluus let med odrum helgum domum flytia af Miklagardi i Franz. Sem þeira ouinir sia þenna hlut, hlogu þeir ok skutu at þessu helga klædi. Enn þegar i stad wrdu allir þeir, er at borginni sottu, blindir ok mattu [huorki ganga fram ne aptr[11]. Borgarmenn hlupu[12] vopnadir vt af borginni, er þeir sꜳ þat, ok hefndu sinna meingerda sediandi sina reidi i drapi guds ovina ok sinna eptir sinum vilia. Hrolfr hofdingi hermanna[13] komzt vndan, huern er gudlig milldi vardueitti, at hann [tok helga trv Kristz[14]. Fyrr nefndr Hrolfr vann sidan Rothomagum ok þa stadi, sem þar ero nær. Enn sem gudlig milldi vendi þeiri reidi, [er ꜳ Fracka riki hafdi leingi legit, i myskunn[15], þa sigradi Robertus iarl af Paris ok Rikardus hertugi Burgundie Nordmenn[16], þa er meirr enn .xl. ꜳra hofdu miok eydt Franz. Tok hofdingi Nordmanna Hrolfr ok annar hofdingi frændi hans, er Gello het, ok allr þeira herr kristni med þeim skildaga, at eptir rꜳdi sinna hofdingia het Karl konungr at gefa Hrolfi sina dottur, ok þar med þat riki, er Neustria heitir. Robertus hertugi af Paris hellt Hrolfi undir skirn ok gaf honum sitt nafn. Þessi Robertus, er fyrr het Hrolfr, hellt fyrr sagt riki af Fracka konungi sem sinum herra, var þat sidan sakir Nordmanna, er þar bygdu, kallat Nordmannia[17].
[Suo er sagt, at þa er Fracka konungs menn, þeir sem voru vid þetta sattmal, beidduzt, at Hrolfr mintizt vid fot konunginum, er honum veitti suo mikla ærv, forsmꜳrr Hrolfr at leggiazt til fota nockurum manni, ok tok med hendi fot konungsins ok dregr upp at munni sier. Sem Nordmenn sia konunginn falla ꜳ bak, hlægia þeir. Frackar taka þetta med reidi, adr Hrolfr verndar sik suo, at hann segir þenna sid vera i sinu landi. Þessi Robertus var hinn fyrsti hertugi Nordmannie. Hans son var Guillelmus fadir Rikardar. Rikardus gat son, er Rikardus het, ok annan, er Robertus het. Þessi Robertus vann Pul ok Sikiley, hann lagdi vndir sik Calabriam ok Veneciam, hann sigradi Alexium Griklandz keisara. Þessi er Robertus Guiscardi fadir Vilhialms bastardar Eingla konungs[18].
Fotnoter:
- ↑ Saugn Guillel(mi) Overskr. E.
- ↑ Guillelmus E.
- ↑ forsia E.
- ↑ Cacus E.
- ↑ þær tilf. E.
- ↑ [gaufugri ætt E.
- ↑ riki ok tilf. E.
- ↑ treystir E.
- ↑ [manna E.
- ↑ [sua E.
- ↑ [eigi ganga, huorki aptr ne framm E.
- ↑ hliopu E.
- ↑ hermannanna E.
- ↑ [tæki kristiliga tru E.
- ↑ [fra Fracka konungi, er leingi hafdi þar ꜳ legit E.
- ↑ mgl. E.
- ↑ Nordmandia E.
- ↑ Dette sidste Afsnit mangler i E.
