Maríu jartegnir - Frá einum klerk (2)
| Velg språk | Norrønt | Islandsk | Norsk | Dansk | Svensk | Færøysk |
|---|---|---|---|---|---|---|
| Denne teksten finnes på følgende språk ► |  |
Frá einum klerk
B (Varianter fra A)
Í þeim stað er Rotomagensi heitir, ok í einnihverri kirkiu í staðnum, var einn bindendislauss klerkr ok gálauss, ok hann hafði allan alldr sinn hverskonar maðr verit, fyrir utan þat at hann elskaði miök guðs móður Mariam, ok féll hvern dag á kné fyrir hennar líkneskiu[1] ok sagði athugasamliga [Ave Maria versit allt út[2]. En er [svá fór fram um hans ráð[3], þá andaðiz hann. En erkibyskup, sá er þar réð fyrir, vissi [hvert verit hafði líf klerks þessa, ok sagði[4] þat makligra, at hann væri eigi at kirkiu grafinn, ok af því at hann var kristinn at nafni, þá lét hann grafa hann í utanverðum kirkiugarðinum. Þá er fáir dagar vóru liðnir, vitraðiz Maria dróttning erkibyskupi ok sýndi sik nökkut reiða, [sagði sér gerva mikla meingiörð[5]. Erkibyskup hræddiz ok undraðiz ok sagði: „Heyrðu, dróttning, einkanlig ván[6] allra manna! Hverr um alldr var svá diarfr, at þér gerði meingerð?“ Hon svaraði: „Þú ert sá.“ Þá hræddiz hann at meir ok spurði, hveriu[7] um sætti. Hon svaraði: „Ek átta hér þión at þessi kirkiu, þó at hann lifði eigi svá siðliga sem skylldi, þá var hann þó vanr at koma til göfganar minnar minningar, ok sagði þá ena guðligu heilsan, [fyrir þeirar tákn er allr heimr er hólpinn, ok svá sem engillinn sagði einu sinni, þá sagði siá á hverium degi með knébeðiar föllum[8]. En at þú vitir hann vera í tölu hiálparmanna[9], þá far þú til graptar hans ok graf til hans ok lúk upp munni hans, ok muntu þar finna liliu grœna, fyrir þat et guðliga mál[10], er af hans munni var vant fram at fara.“ Síðan leið frú sancta Maria til himins. En byskup vaknaði ok varð óttafullr miök. Þegar er mornaði, sagði hann sínum mönnum, hvat honum var vitrat. [Eptir þat fór erkibyskup ok klerkar hans[11] ok grófu upp þenna klerk, ok fundu í munni hans lilium, sem [María hafði sagt. Síðan fœrðu þeir klerkinn ok grófu, sem vert var, sœmiliga[12] millum annarra klerka. Guði sé dýrð í verölld verallda. Amen.
Fotnoter:
- ↑ líkneski A.
- ↑ [Maríu vers A.
- ↑ [saal. A; því fór fram hans ráði B.
- ↑ [giörla hvert er lífi klerks þessa hafði verit ok kvað A.
- ↑ [kvat sér í móti giört vera A.
- ↑ ok hiálp tilf. A.
- ↑ hví A.
- ↑ [saal. A; er allr heimr er hólpinn fyrir B.
- ↑ saal. A; hialpaðra manna B.
- ↑ ok hit góða mál ok hit himneska A.
- ↑ [Þegar síðan fór erkib. siálfr ok klerkar hans til graptarins A.
- ↑ [sagt hafði siálf móðir sannleiks. Síðan lofuðu þeir guðlig huggiœði ok fœrðu klerk, sem vert var, til graptarkirkiu ok grófu hann A.
